ती - २

ती अजूनही तिथं धंद्याला उभारते, कामावरून घरी येत असताना दररोज दिसते. रात्र कशीही गेली तरी अंधारातही मेकअप लख्ख उठून दिसतो. नेहमी इशारे करते. ट्रक ड्राइव्हर तिचं नेहमीचं गिऱ्हाईक. कधी १०० रुपये तर कधी १५०. कंडोम चे वेगळे पैसे. धंद्याचे वसूल पक्के आहेत. टवाळ पोरं त्रास देतात, दमदाटी करतात. टोळक्याने घुसतात आणि हात टाकायला बघतात. अश्लील शेरेबाजी. तरीही सहन करते ती. दारूने तुंबलेलं तोंड घेते तोंडात. तिला कधीही नशा चढत नाही. मेंदू स्थिर असतो. कधी एक, कधी दोन तर कधी तीन तीन सुद्धा घेते. पैसा कुणाला नकोय. तिच्यासाठी ओव्हरटाईमचं ते. कधी कधी ट्रक च्या मागे आडोसा भेटतो आणि तिथंही होऊन जातं, जे हवं असतं, दोघांनाही. त्याला शरीर अन् तिला पैसा.

तिला साथ मिळते हिजड्यांची. धंद्यात स्पर्धा होते, पण मिळून करतात ते काम. कितीही मर्द असला तरी समोर किन्नर दिसला की गप्पगार होतो. ती गाडीत बसून जाताना हा किन्नर गाडीचा नंबर नोट करून ठेवतो. ती भोगायचाचं पैसा घेत असली तरी त्यांच्या सुरक्षेची काळजी ते स्वतःच घेतात.

तिला अबला किंवा नारी वगैरे म्हणून उगाच अपमान नाही करायचा मला. भले भले काँटॅक्टस आहेत तिच्याकडे. पोलिसांचं कुठं आडलं तर पहिला नंबर तिला लावतात. धंदा असला म्हणून काय झालं स्वाभिमानाचा आहे. इज्जत विकून देखील स्वाभिमान जपते ती. कधी चकार शब्द काढत नाही. कुठली फिलॉसॉफी नाही. उलट दिसेल तेव्हा तिचा हसरा चेहरा. वाटतं कधीतरी कि थांबावं, आणि विचारावं तिच्या मनात आहे तरी काय? नक्कीच एक कथा दडलेली असणार. लख्ख शरीरावरचे व्रण भळभळत असणार. तिलाही लागत असेल भूक.. प्रेमाची..

- ललित जमदाडे
७०२०८१८१३७