मुलगी कशी पाहिजे ?

आता एवढा कठीण प्रश्न नाहीच आहे हा कि सांगता येणार नाही कि मुलगी कशी पाहिजे; पण तरीही सांगा, प्रश्न वाचल्यावर पहिल्यांदा कोणता विचार आला डोक्यात ? कशी पाहिजे मुलगी? सुंदर, सोज्वळ, गोरी, देखणी, हुशार, मनमिळाऊ, घरघुती, सांभाळून घेणारी, प्रेम करणारी, तुमच्या बाळाला जन्म देणारी आणखी खूप काही Features असलेली. मुलांची लिस्ट तर लांब असतेच; आपलं तोंड आलुसारखं असलं तरीही त्यांना मुलगी मात्र मलाई सारखी हवी असते. आता लग्नाचा सीजन चालूच आहे तर म्हटलं एकदा या विषयावर लिहून पाहावं; काय खरं !! कदाचित कोणती मुलगी हे वाचेल आणि मला येऊन म्हणेल, “शुभम, तुला पाहिजे एकदम तशीच आहे मी, आणि मला तू अगोदर पासूनच आवडतोस...” माझं लग्न जुळून जाईल आणि तुम्हाला पण पेढे खायला मिळतील ना राव... म्हणून मग आवडलं तर वाचून झाल्यावर नक्की शेयर करा...

तसा हा प्रश्न एकदम साधा आहे कि, मुलगी कशी पाहिजे, पण याच उत्तर काय असेल हे मात्र पूर्णतः विचारणाऱ्या व्यक्ती वर अवलंबून असते; कि कुणी आणि कुठे हा प्रश्न विचारला आहे. एखाद्या कवी/लेखकाने विचारलं तर मी एकदम फॉर्म मध्ये येऊन सांगतो;

मुलगी पाहिजे,

चार चौघांत उठून दिसणारी;

गर्दीत ओढणी सांभाळणारी;

हलकेच गालात गोड हसणारी;

“शुभ्या” म्हणून हाक मारणारी;

मुलगी पाहिजे;

स्वतःच्या पायावर उभी असणारी;

अप्सरा+बायको कॅटेगरीत मोडणारी;

मला समजून घेणारी;

आणि माझ्यावर प्रेम करणारी...

लेखकाने नाही विचारलं आणि आईने विचारलं कि “बापू शुभम, कशी मुलगी पाहिजे तुला?”

तर “आई, तुला सांगू... असंच पावसाळ्यात मस्त गरमा-गरम भजी करणारी; थोरा-मोठ्यांचा आदर करणारी; लहानांचे लाड पुरवणारी, सुंदर-सोज्वळ (खरंतर सोज्वळ मुलींची प्रजाती आता लुप्त होत चालली आहे) एकदम बायको कॅटेगरी मधली सापडत असेल तर बघ जरा तुझ्या ओळखीतली, ती चालेल मला.”

साधारणतः “बायको कॅटेगरी” म्हटलं तर Typical Indian नारी चे सगळे Features गृहीत धरायचे.

एखाद्या वेळा पाहुनी आलेल्या आणि आपली शंभरी गाठत असलेल्या आजीने सुपारी खात जर विचारलं तर तिच्या कानात मोठ्याने सांगायचं – “मनोभावाने देवाची पूजा, दिवा-वात करणारी, सणा-वाराला पुढाकार घेणारी, तुमचे पाय दुखत असेल तर दाबून देणारी अशी शोधुया म्हटलं !! काय म्हणता?” “मिळेल, नक्की मिळेल !!” – मुलगी मिळो अथवा नाही पण असा आशीर्वाद मात्र मिळतो.

बेस्टफ्रेंड ने विचारलं कशी पाहिजे ? तर साधं-सरळ-अचूक उत्तर – माल.

पण हाच प्रश्न जर “CRUSH”ने विचारला तर मात्र माझ्यातला लेखक जागा होऊन जातो; - “तुला सांगू कल्याणी, मुलगी ना सर्वसाधारण पाहिजे, दिसायला बऱ्यापैकी असली तरी चालेल पण माझ्या मनाला समजून घेणारी, मला प्रोत्साहन देणारी, माझ्यावर विश्वास करणारी असली पाहिजे; तिचा भूतकाळ काहीही असो गं पण भविष्यात माझ्या खांद्याशी खांदा भिडवून चालणारी, मला साथ देणारी असली पाहिजे. खरं पाहिलं तर ती तुझ्यासारखी असावी; तू आहेसच ना इतकी छान मुलगी, तुझ्यासारखी असेल तर सांग एखादी”

शेवटी लग्न करायचं म्हटलं ना, तर “माल कॅटेगरी” सोडून “अप्सरा कॅटेगरी” किंवा “बायको कॅटेगरी” यांना जास्त प्राधान्य दिलं जातं...

आता माझं सर्वात जास्त प्रेम आहे वंदनाबाईवर; म्हणून तिच्या म्हणण्या म्हणण्याप्रमाणे तिच्या मुलासाठी मुलगी कशी पाहिजे तसं सांगतो... 

1. ती हुशार आणि Confident असावी. College Degree Holder नसली तरी चालेल; Monaco आणि Happy-Happy Biscuits दोन्ही पारले बनवतात हे माहिती नसलं तरी चालेल पण नागपूर रेल्वे स्टेशनवर मागे सुटली तर न चुकता नांदोरीपर्यंत आली पाहिजे; हुशार आहे कि नाही हे बघायसाठी आता तिला मागे सोडणार नाही पण; निदान ती इतकी हुशार तरी पाहिजे.
2. तिला माझं Cricket, Football, Tennis, Badminton आणि Computers वर असणारं प्रेम मान्य पाहिजे. या सगळ्यांत रुची असेल तर मग आणखीच छान.
3. कोणते कोणते Games खेळता येते तर Candy Crush आणि Clash of Clan असं भारी उत्तर देणारी नसावी.
4. तिला जर “ससुराल सिमर का” आणि “दिया और बाती हम” मध्ये रुची असेल तर माझ्या आईशी लवकर गट्टी जमण्याची शक्यता आहे.
5. आणि सर्वात महत्त्वाचं म्हणजे; ती सुंदर असावी. चेहऱ्यावरून सुंदर नसली तरी विशेष फरक पडत नाहीच मला पण मनाने निर्मळ असावी.

ही झाली आईची यादी; अशी मुलगी कुठे असेल तर चांगली सासू मिळविण्याची संधी गमावू नये... पण; त्यावरही

मुलगी कशी पाहिजे? हा प्रश्न अजूनही जश्याने तसाच आहे. मी म्हणतो कश्याला “कशी आहे” हा विचार करायचा !! कशीही असो ना, काय फरक पडतोय? Entrepreneur असो वा Corporate Job करणारी, Virgin असो वा नसो, तुझ्या जातीची असो वा दुसऱ्या जातीची, दिसायला माधुरी दीक्षित असो वा साधारण; तिची तयारी आहे ना तुझ्यासोबत आयुष्यभर फक्त तुझी होऊन जगण्याची, कठीण परीस्थित तुला पाठींबा द्यायची, सुकाळात आनंद दुप्पट करायची मग तू घे ना एक पुढाकार... तिला साथ देण्याचा.

लग्न करण्यासाठी ती मुलगी असणं पुरेसं नाही आहे का? तू किती तीर मारले आहेत सगळ्यांना माहिती आहे मग का उगाच तिच्यात किंचित थोडीशी खोट असली तर तिसरं महायुद्ध सुरु झाल्यासारखं React करायचं...? ती जर दिसायला साधारण असली तर तुझ्या बाळाला जन्म देणार नाही का? कि कमी शिकलेली असेल म्हणून खात्रीनेच सांगतोय तिच्यात संस्कार नावाची गोष्ट नसेल? Entrepreneur असेल तर तुला वेळ देणार नाही का? कि Job करणारी असेल तर तुझ्या घरचे काम करणार नाही? गावातली असेल तर तुझ्यावर प्रेम करणार नाही? कि शहरातली असेल म्हणून तिला मान-मर्यादा नसतील?

सरळ आणि सोप्पं समीकरण असते मुलींचं; त्या आपल्यामागे आई-वडील, भाऊ-बहिण आणि असला-नसलेला संपूर्ण परिवार सोडून, लग्न करून तुझ्या घरी येणार असतात. आणि फक्त एकच अपेक्षा असते – जसं प्रेम तिला आजपर्यंत मिळत आलं तसंच समोरही मिळत रहावं. तुझ्यासाठी ती आपलं नाव बदलते, २०-२५ वर्षापासून राहत असलेली घर सोडते, आणखी माहिती नाही काय-काय गोष्टींचा त्याग करून ती तुझ्याकडे पाहून संसार करायला येते; जर तुला या गोष्टींची पर्वा नसेल तर हरकत नाही निदान तिच्यावर Requirement Form लावून अपमान तरी करू नकोच. समजलं ना !!

मुलगी पाहिजे ना तर सगळ्याच मुली सुंदर असतात, देखण्या असतात, मनमिळाऊ-प्रेमळ आणि सांभाळून घेणाऱ्याही असतात फक्त सोबत चालायची आपली तयारी पाहिजे. बस त्यांना समजून घेतलं पाहिजे. – हि गोष्ट वेगळी कि मुलींना कोणीच समजू शकत नाही.

पुन्हा भेटू...

- शुभम न. दातारकर